Associació Catalana d'Esperanto


Notícies

Inici > Actualitat > Notícies > Aran a aculhit lo 1r Congrès Occitan d’Esperanto

Aran a aculhit lo 1r Congrès Occitan d’Esperanto

Comparteix

Salardú (Val d’Aran) aculhiguèt del 1r al 3 de novembre lo 1r Congrès Occitan d’Esperanto, que se debanava dins l’encastre del 36n congrès catalan de la lenga internacionala. “L’esperantisme e l’occitanisme son las doas fàcias de la meteissa moneda”, çò diguèt Jacme Taupiac a prepaus de la lucha per la lenga pròpria, per la promocion de la lenga internacionala nèutra, per la sostenabilitat e per la democracia lingüistica.

La majoritat de las conferéncias tractèron las minoritats lingüisticas d’Euròpa, mai que mai las problematicas de l’occitan (antioccitanisme, antinormisme, vergonha…) e sas relacions amb las lengas vesinas. Dins aquel sens cal soslinhar las relacions del basco amb lo gascon, e dels gascons amb lo Bascoat. De son costat, lo cap de la politica lingüistica del govèrn aranés, Jusèp-Loís Sans, expliquèt la politica lingüistica de l’occitan dins Occitània tota.

Se vesitèt lo Musèu de la Val d’Aran per conéisser melhor l’istòria del país, après la conferéncia de l’istorian Carles Vela sus las efemeridas que se celèbran ongan: la Batalha de Murèth (1213), la Querimònia (1313) e lo Tractat del Plan d’Arrem (1513).

La literatura a normalament sa seccion dins aquel tipe de congrèsses. Ongan es l’escrivan Abel Montagut qu’a gausat rescriure lo darrièr trabalh inacabat de l’escrivan esperantista Jules Verne. Montagut presentèt sas recèrcas sus l’autor d’expression francesa. Se faguèt tanplan un omenatge al poèta catalan Salvador Espriu, dins lo centenari de sa naissença, a travèrs de son òbra traducha en la lenga internacionala.

A prepaus dels engatjaments socials e politics, se remembrèt l’òrra situacion dels exiliats republicans de la Guèrra d’Espanha en Occitània; tanben se presentèt lo projècte social de la vila nòva de Morencs (Bearn) e lo projècte Integra Revolucio.

Las activitats mai festivas se dobriguèron al public aranés, que participèt a un aperitiu occitan animat per Joan-Marc Leclercq, qu’interpretèt de cançons del país. De ser, lo cantaire gascon ofrissiá un concèrt animat en occitan e esperanto.

Participèron un ochantenat de personas venent d’Occitània e dels Païses Catalans, mas tanben d’endacòm mai. D’esperantistas occitans e bascos prepausèron d’organizar lo 2n Congrès Occitan d’Esperanto a Baiona, dins l’encastre d’un 1r congrès basco.


Font: www.jornalet.com

Foto: Irina Zakharova